Moldovanıñ Pridnestrovye regionındaki Rusiye ordusı tolu cenk azırlığına ketirildi, dep bildire Ukraina Silâlı quvetleriniñ Baş ştabı aqşam.
«Moldova Cumhuriyetiniñ Pridnestrovye regionında Rusiye ordusınıñ operativ gruppa bölüvleri «tolu» cenk azırlığına ketirildi. Quvet qurulışları quvetleştirilgen hızmet rejimine keçirildi», – dep aytıla haberde.
Ukraina Silâlı quvetleriniñ Baş ştabı Rusiye arbiyleri işğal etilgen Qırımnen koridor yapmağa tırışa, dep bildire.
Ukraina Tış işler nazirligi «Moldovanıñ Pridnestrovye regionını fevralniñ 24-nde Ukrainağa qarşı Rusiye tarafından başlatılğan büyük cenkke çekmek ıntıluvlarını» takbih ete, dep bildirdi.
Soñki künleri Moldovanıñ Pridnestrovye separatist regionında patlav ve ateş aqqında haber etile.
Aprelniñ 26-nda Moldovanıñ Yüksek telükesizlik şurasınıñ toplaşuvı olıp keçti. Moldova prezidenti Mayya Sandu bu adiselerni «vaziyetni kerginleştirmek istegen Pridnestrovyedeki çeşit gruppirovkalar arasındaki zıddiyetlerniñ neticesi» olaraq saya, dep bildirdi. O, devlet müessiselerine diqqatlı olmağa, vatandaşlarğa ise raat olmağa tevsiye etti.
Pridnestrovye – 1992 senesinden berli Kişinev kontrol etmegen Moldovanıñ separatist regionıdır. Rusiye 20 yıldan berli Pridnestrovyede tahminen 1700 arbiyni tuta.
Martnıñ başında Pridnestrovye akimiyeti Moldovanı olarnıñ «mustaqilligini» tanımağa ve Moldova reberliginiñ Avropa Birligine kirüv arizasını bergen soñ devletlerara añlaşmanı imzalamağa çağırdı.
Aprelniñ 22-nde Rusiyede Ukrainadaki «mahsus operatsiyanıñ» (Rusiye yapqan ücümini böyle adlandıra – QA) ekinci fazası vaqtındaki yañı planlar aqqında ayttılar. Rusiye arbiyleri işğal etilgen Qırımğa qara ayatnı temin etmek ve Pridnestrovyege çıqmaq içün Donbasnı ve cenübiy Ukrainanı kontrol altına almağa niyetlengenlerini bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
