Ukraiyna Prezidetniñ Qırım MC-deki daimiy temsilcisi Tamila Taşeva Qırım Rusiye ordusından azat etilgen soñ RF vatandaşlarınıñ yarımadadan çıqarılması ile bağlı beyanatından soñ tehdit etilgenini bildirdi. O, Qırımdaki rusiye tarafdarı bloger Aleksandr Talipovnıñ "Krımskiy SMERŞ" telegram kanalında şahsiy malümatınıñ yayınlanmasını "qorqunıñ daa bir kösterilüvi" adlandırdı.
Taşeva Facebook saifesinde sabası qorqutmalar ve spamdan başlanğanını haber etti. Tünevin prezident temsilcisi Ukrayina akimiyeti Qırım Rusiye ordusından azat etilgen soñ Rusiye vatandaşlarını andan bütünley çıqaruv variantını baqqanını bildidri.
Bundan soñ "Krımskiy SMERŞ" telegram kanalında Taşevanıñ şahsiy malümatı yayınlandı, oña qarşı aqaretlev ve qorqutuv sözleri yazıldı. O, "Krımskiy SMERŞ" Telegram kanalına şikâyet etmege çağırdı.
Bu telegram kanalınıñ saibi rusiye tarafdarı bloger Aleksandr Talipovdır. O, RF Ukrayinağa qarşı cenkini desteklemegenlerni çaqa.
Evel, Qırım ve Aqyar şeeriniñ prokuraturası rusiye tarafdarı qırımlı bloger aleksandr Talipovnıñ "TalipoV Online Z" telegram kanalında "milletlerara zıddiyet çıqarması" maddesi ile cinayet davasını açtı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
