Ukrayina prezidentiniñ Qırım MC-deki Temsilciligi Rusiye mahkemesiniñ qırımlı Aleksandr Taraponğa çıqarğan ükümni takbih etti. O, soyu aqqında "arbiy cinayetçi" bildirmelerini darqatqanı içün sert apis cezasına mahküm etilgen.
Temsilcilikte qayd ettiler ki, Taraponğa qarşı çıqarılğan üküm Qırımda Rusiye ordusını "itibardan tüşürüv" qabaatı ile malüm olğan ilk adisedir.
Ukrayina akimiyetiniñ malümatına köre, doğma aluştalı Aleksandr Tarapon sahte Qırım referendumından evel ve ondan soñ "faal şekilde Rusiye propagandasına qarşılıq köstergen".
"Büyük istilânıñ başlamasından soñ, rusiye ordusınıñ Ukrayina topraqlarındaki kütleviy arbiy cinayetleri malüm olğanda, (Tarapon - QA) rus askeri olğan qarısınıñ bir aqrabasınıñ yaşağan köyde bildirmeler asıp çıqqan. Bildirmelerde onıñ süreti ve mında balalarnıñ qatili "arbiy cinayetçi yaşay" yazısı bar edi. Aleksandrnıñ apayı Adel büyük istilâ başlanğan soñ arbiy areketler mıntaqasındaki ukrayinlerge psihologik yardım kösterdi", dep haber ettiler temsilcilikte.
Aleksandr Tarapon 2022 senesi martnıñ 31-ne keçken gecesi yaqalandı
"O ve apayı türlü dairelerde edi, şunıñ içün Adel kiralanğan daireden anahtar tapıp olmağanda işğalciler onı qorqutıp tehdit etmege başlağanlar. Temsilcilik Rusiye tarafından Ukrayina vatandaşı Aleksandr Taraponnıñ taqip etilmesini ve apayı Adel Taraponğa çıqarılğañ qanunsız cöremelerni qatiyen takbih ete", - dep yazıla bildirmede.
Oktâbrniñ 21-nde Aluştanıñ işğalci mahkemesi Aleksandr Taraponnı 2 yıl ve 6 ay apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
