Ukraina prezidentiniñ Qırım Muhtar Cumhuriyetindeki temsilciligi, belli bir kanalğa bağlı olmaycaq qırımtatar yayınlarınıñ saqlap qaluvına qoltuta.
Bu aqta yanvarniñ 15-nde prezidentniñ Qırım Muhtar Cumhuriyetindeki daimiy vekiliniñ muavini Tamila Taşeva, UATV çetel yayın ukrain telekanalınıñ qırımtatar ve ingliz tilli muarririyetleriniñ qapatıluvını izaatlap, Qırım.Aqiqatqa bildirdi.
«İlk evelâ aytmamız kerek ki, bu meseleni biz al etip olamaymız. Amma temsilcilikniñ rolüni añlaymız, çeşit devlet akimiyet organları arasında «köpürçik» olıp, işğal etilgen topraqlarnıñ meselelerini çezmek kerekmiz. Şunıñ içün işğal etilgen topraqqa yayın meselesi akimiyet organımıznıñ menfaatlar saasında qala. Yayın restrukturatsiyası olacağını ve bu muarririyetniñ qapatılması planlaştırılğanını bilgende Medeniyet, gençlik ve sport nazirliginen bağlanıp, bu meseleni laf ettik», – dep ayttı Tamila Taşeva.
Onıñ bildirgenine köre, işğal altındaki topraqlar içün qırımtatar yayınlarını saqlap qalmaq müim ola.
«Qırımtatar tili Ukraina tamır halqınıñ tili olaraq inkişaf etmeli, bunı añlaymız. Bu tilde çoqça ses ve videonıñ çıqması pek müim ola. Bu menfaatlarnı qoruycaqmız, bizni böyle yayınnıñ belli alternativası olacaq, dep işandırdılar. Amma bu Medeniyet, gençlik ve sport nazirligi seviyesinde de tasdıqlanmalı. İşğal etilgen topraqlar içün yayınlarnen bağlı ayrı reberlik olmalı», – dep qoştı o.
Yanvarniñ 13-nde UATV halqara yayın ukrain telekanalınıñ ingliz ve qırımtatar tilli muarririyetleri işini toqtattı.
Yoq etilgen Ukraina haber siyaseti naziriniñ sabıq muavini Emine Cepparnıñ bildirgenine köre, hadimlerni uzun tatilge yollaylar.
«Bilgenime köre, şimdi qırımtatar muhtariyetiniñ işini uzatmağa planlaştırmaylar. Yani qırımtatar tilinde yayın yapmağa niyetleri yoq», – dep yazdı o, Facebookta.
Telekanal Ukraina haber siyaseti nazirligi tarafından 2015 senesi quruldı. Onıñ maqsadı çetel seyircilerine Ukrainadaki adise-vaqialar aqqında tarafsız, aktual ve tolu malümat bermek edi. UATV bütün dünyada kabel ağlarında bar edi.
2020 senesiniñ başında telekanalnıñ yañı reberligi diger memleketler içün yayınlar toqtatıla, dep ilân etti.
Memurlar, 2020 senesi fevral ayında UATV esasında Ukraina akimiyeti kontrol etmegen topraqlar içün rus tilli telekanal açılacaq, dep ilân etti.
