Ukraina prezidentiniñ Qırımdaki temsilciligi Ukrainanıñ milliy telükesizligi içün havflı olğanlar cedveline kirsetmek içün 2020 senesi devamında yarımadada yırcılar, oyuncılırnıñ kontsertleri, film çekimleri ile bağlı 36 faktnı topladı. Bunıñ aqqında temsilcilik Facebookta haber etti.
«Temsilcilik, işğal müdiriyetiniñ vaqtınca işğal etilgen QMC ve Aqyar şeeriniñ işğal etme yıntıluvını qanuniyleştirmesi içün yapılğan faaliyetini sistematik olaraq közete ve er bir böyle adiseni merkeziy icra organları ile işlep çıqa», – dep yazıla bildirmede.
2021 senesi QMC ve Aqyar şeeriniñ prokuraturası Keriç köprüniñ açıluvında iştirak etken 23 rus artistine qarşı cinayet davasını açtı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
