Rusiye prezidenti Vladimir Putin Ukraina prezidenti Volodımır Zelenskıy ile telefonda laf etti. Subet Ukraina tarafınıñ teşebbüsi ile kerçekleştirildi, dep haber ete Kremlniñ matbuat hızmeti.
«Ukrainanıñ cenübi-şarqında tertiplev ve eki tarafta da tutulğan şahıslarnıñ qaytarıluv meseleleri muzakere etildi. Bu işniñ ekspertler seviyesinde devam etmesi aqqında qarar alındı. Bağlarnıñ «norman formatında» devam etüv imkânları da muzakere etildi», – dep aytıla Kreml matbuat hızmetiniñ haberinde.
Al-azırda Zelenskıynıñ vekilleri bu malümatnı izaatlamadı.
Hatırlatamız, Ukraina prezidenti Volodımır Zelenskıy Rusiye prezidenti Vladimir Putinge Minskte körüşmege teklif etti. Bu aqta o, NewsOne ukrain şahsiy kanalı ve «Rossiya 24» Rusiye devlet telekanalı arasında keçirilmesi planlaştırılğan telekoprüni (telekoprü lâğu etildi) izaatlap, video muracaatında aytqan edi.
«Rusiye prezidenti Vladimir Vladimiroviç Putinge muracaat etmege isteyim. Laf etmek kerekmi? Kerek. Qırım kimge ait ve Donbasta kimler olmağanını muzakere eteyik», – dep ayttı Zelenskıy.
O, «subet içün taqım» olaraq Amerika Birleşken Devletleri prezidenti Donald Trump, Büyük Britaniya baş naziri Tereza Mey, Almaniya kantsleri Angela Merkel ve Frenkistan prezidenti Emmanuel Makronnı davet etmege teklif etti.
