Ukrayina prezidentiniñ Qırım MC-deki daimiy temsilciligi mecburen Rusiye ordusına seferber etilgen Qırım sakinlerine esirlikke doğru teslim olmaqnıñ yolları ile talimat yayınladı.
Temsilcilikte, eger arbiy cinayet emirlerni yerine ketirmegen olsa, arbiy areketler bitken soñ o evge qaytıp olacağını qayd ettiler.
Bundan ğayrı, Prezidentniñ Qırım MC-deki Temsilciligi, esirge teslim olğan zaman şahsiyetni tasdıqlamaq kerek olacağını bildireler, şunıñ içün er keske yanında kerekli vesiqalarnıñ ya da şahsiyetni tasdıqlap olcaq soy-soplarnıñ telefon nomerleri olmasını tevsiye eteler.
Özüñizni teslim etmek içün lâzim:
- Silânı kenarğa atmaq ya da sol omuzğa asmaq;
- Doğru turmaq;
- Qollarnı ya da beyaz bayraqnı kötermek;
- Yüksek sesnen "Tkslim olama" qıçırmaq;
- Ukrayina arbiyleriniñ, küç hızmetleri temsilcileriniñ emirlerini beklemek.
Gruppanen teslim olsañız:
- Bütün olğan silânı ögüñizde mesafede qoymaq;
- Arbiy tehnika ögünde doğru turmaq. Onı sözdürmek kerek;
- Ukrayina arbiylerine teslim olmaq istegi aqqında bildirmek içün eñ azın bir zabit kerek (ya da zabit olmağan taqdirde üyken arbiy).
Teslim olmaq niyeti aqqında malmüat bermek içün Ukrayina Mudafaa Nazirligi ile +380983427931 nomeresine telefon aça bilesiñiz.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
