2014 senesinden berli işğal altındaki Qırımda 45 insan ğayıp oldı, 15-iniñ taqdiri alâ daa belli degil. Bu aqta Ukraina prezidentiniñ Qırım Muhtar Cumhuriyetindeki daimiy temsilciliginiñ matbuat hızmeti Facebookta bildirdi.
Qayd etilgenine köre, Ukraina Nazirler Şurası hususiy alda ğayıp olğan şahıslarnıñ meseleleri Komissiyasını şekillendire. Komissiya işi başlağanınen Prezidentniñ temsilciligi işğal vaqtında Qırımda ve Aqyarda hırsızlanğan insanlarnıñ meselelerini köterip, Qırım Muhtar Cumhuriyetiniñ Prokuraturasınen bağda olmağa planlaştıra.
Prezident Volodımır Zelenskıynıñ Qırımdaki daimiy temsilcisiniñ muavini Tamila Taşevanıñ qayd etkenine köre, yarımadada insan hırsızlavları – «işğalciniñ qorqu müitini yaratmaq, ğayıp olğanlarnıñ tuvğanlarını ve dostlarını qorquzmaq içün yapqan eñ ağır cinayetlerinden biridir». Onıñ aytqanına köre, Rusiye Çeçenistanda ve işğal etken topraqlarında böyle yapa.
«Tüşünip baqıñız, bir insannı yaqınlarınıñ yanında urbalı uquq qoruyıcılar tuta – devlet agentleri – soñra bu insan ğayıp ola: ne SİZOda, ne politsiya ya da mahkemede, ne hastahanede tapıp olalar, evge kelmey. Bu şeyler aylarnen ve yıllarnen devam ete bile», – dep bildirdi Taşeva.
Onıñ aytqanına köre, devlet bu vaziyette insanlarnıñ hırsızlanmalarını qayd etmeli, vekâletleri çerçivesinde tahqiqat keçirmeli ve ğayıp olğanlarnıñ tuvğanlarına qol tutıp, halqara teşkilâtlarnı celp etmeli. Tamila Taşevanıñ bildirgenine köre, tek maddiy yardım aqqında laf ketmey, maneviy destek de olmalı, tahqiqat vaziyetine dair malümat da olmalı.
«Hırsızlanğan bütün insanlarnıñ adlarını bilmek kerekmiz, çünki 45 ve 15 raqamları arqasında insanlar, onlarnen ve biñlernen insannıñ közyaşları ve ümütleri bar», – dep qayd etti Taşeva.
Temsilcilik bir haber alınmağan ğayıp olğan qırımlılarnıñ cedvelini de derc etti: Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.
Faaller hırsızlanğan qırımlılarnıñ tuvğanlarına qol tutuv videosını qayd etti.
Keçken sene advokat Emil Kurbedinov «Qırımda Ervin İbragimovnıñ hırsızlanuv davasınıñ tahqiqatı bozula», dep qayd etken edi.
Ervin İbragimov hırsızlanğan kününiñ yılında Kyivdeki Rusiye elçihanesi ögünde faller qırımlınıñ ğayıp olmasını tahqiq etmek talabınen aktsiyalarnı keçire.
Bağçasarayda 2016 senesi mayısnıñ 24-nde aqşam şeer şurasınıñ deputatı, Dünya Qırımtatar Kongressi icra komitetiniñ azası Ervin İbragimov hırsızlanğan edi. Onıñ maşinası yol ortasında tapıldı. Ğayıp olğan kişi mayısnıñ 25-nde Meclis azalarınen beraber Sudaqqa baracaq edi, anda qırımtatar faalleriniñ mahkemesi planlaştırılğan edi.
Qırımtatar faali Nariman Celâl tutulğanını video nezareti kameraları qayd etti, dep bildirdi. Video uquq qoruyıcı organlarına berildi.
«Videoda, onı körgenlerniñ aytqanlarına köre, yol patrul hızmetiniñ urbasında insanlar bar, olar Ervin İbragimovnı toqtatıp, maşinadan alalar ve diger avtobusqa mindireler, ondan soñ ise keteler», – dep aytqan edi Celâl 2016 senesi. Daa soñra Ervin İbragimovnı Bağçasarayda tutuv videosını kütleviy haber vastaları derc etti.
Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.
