Tedbir Qırım musulmanları diniy idaresiniñ territoriyasında olıp keçti.
"Keçken sene biz yañı bir adetni başlattıq - böyle şekilde Ramazan ayını qayd etmek. Devletimizniñ siyasiy reberligi, arbiy komandanlığı, ukrayin musulman cemiyetiniñ vekilleri, Qırımtatar Milliy Meclisi ve diplomatik korpus - episi bir yerde. Bugün mında beraber olğanımız içün pek memnünim. Birlik er vaqıt müimdir. Yaşayış cenk ve yamanlıq tarafından qaralanğanda, birlik daa da müimdir", – dep qayd etti Zelenskıy.
Ukrayina devletiniñ yolbaşçısı Ukrayina içün küreşken ve çalışqan er keske minnetdarlığını bildirdi.
"Ukrayina mudafaa ve telükesizlik quvetleri terkibinde devletimizni, serbestligimizni qorçalağan bütün musulman askerlerni qayd etmege isteyim. Er bir askerimizge cesürligi içün teşekkürler bildirem. Bütün toprağımıznıñ ve Qırımnıñ azat etilmesini yaqınlaştırğan er kesni", – dep qayd etti Prezident.
Volodımır Zelenskıy ile beraber iftarda Ukrayina Silâlı quvetleriniñ saflarında memleketini qorçalağan ukraiyn musulman arbiy hızmetçileri iştirak ettñ. Prezident, Ukrayinanıñ suvereniteti ve topraq bütünligini qorçalavda cesürlik ve fedakârlıq köstergen istihbaratçılar, topçular, qurşunatqıççılar, ücümcilerge III derece Boğdan Hmelnotskıy ve III derece "Cesürlik içün" ordenlerini berdi.
Zelenskıy, Ukrayinanıñ işğal etilgen territoriyasında semetdeşlerini qayğırmaq imkânını tapqan er kesni qayd etti.
Qırımtatar halqınıñ lideri Mustafa Cemilev Zelenskıyge, mında bulunğan er keske, em de bugün silâ alıp, Ukrayinanı qorçalağan bütün arbiylerge minnetdarlığını bildirdi.
"Siz şimdi tek vatandaşlıq degil, diniy vazifeniñizni de eda etesiñiz. İslâm printsiplerine köre, Vatan içün cenkleşmek er bir musulmannıñ borcudır», – dep qayd etti o.
Qırımtatar halqınıñ lideri emin ki, bu cenkte qabaatlı olğanlar yapılğan bütün yamanlıq içün cezasını alacaqlar. Aynı zamanda Cemilev bugün ukrayin halqını qorçalamağa yardım etken bütün dünya memleketlerine teşekkür bildirdi.
O, muqaddes Ramazan ayı bütün ukrayin halqınıñ duşmanğa qarşı küreş içün daa çoq birleşmesine sebep olsun, dep tiledi.
Ukrayina mudafaa naziri Rustem Ümerovnıñ qayd etkenine köre, Ukrayina Silâlı quvetleri saflarında biñlernen musulman cenkleşe, ve bu, olar tarafından okoplarda keçirilgen tam miqyaslı istilâ başlağanından berli üçünci Ramazan ayıdır.
"Birlikte toprağımızdan duşmanlarnı quvğan, adalet ve barışıqnı qorçalağan askerlerimizge büyük minnetdarlıq. Dualarımız serbest Ukrayina içün elâk olğanlarnen beraber. Yüce Yaratıcıdan işğalcini tez vaqıtta yeñmege yardım etmesini rica etem. Vatanımıznı, halqımıznı eñ yaqın vaqıtta azat etecekmiz: Yaltadan Çerniğivge qadar, Lugansktan Uçgorodğa qadar vatandaşlarımız içün qanuniylikni temin etecekmiz", – dep qayd etti Ümerov.
Qırım musulmanları diniy idaresiniñ yolbaşçısı Ayder Rustamov iftar duasını oqudı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
