Ukrayina prezidenti Volodımır Zelenskıy iftarğa qoşuldı. Prezident ofisiniñ matbuat hızmeti bildirgenine köre, tedbir islâm dinini kütken Ukrayina arbiyleri, Qırımtatar Milliy Meclisiniñ liderleri, musulman cemiyetiniñ vekilleri iştirakinen keçirildi.
Devlet yolbaşçısı Ukrayina imayesinde musulman arbiylernen rolüni qayd etip, olarğa devlet mukâfatlarını berdi. Zelenskıy Ukrayinanıñ metaneti vatandaşlarınıñ birligine esaslana, dep qayd etti.
"Ukrayina aynı şu sebepten bu cenkte ayaqta qaldı ve imaye etile, çünki teslim olmağan, Ukrayinanı satmağan ve insan itibarına hainlik yapmağan millionlarnen insan bar", – dep ayttı prezident.
O, Ukrayina Qırımnen beraber işğal etilgen bütün topraqlarnı azat etmek içün küreşini devam ettirecek, dep işandırdı.
"Bütün topraqlarımız, Ukrayinada er bir cemiyet, bizim Şarqımız, Donbas, Qırımımıznı unutmaymız. Rusiyege Ukrayinağa ait iç bir şeyni ediye etmeycekmiz – bu printsipial baqışımız", – dep qoştı Zelenskıy.
Prezident Rusiye istilâsı sebebinden zor şaraitlerde oraza tutmağa mecbur olğan ukrayinalı musulmanlarnı qayd etti.
"Endi üçünci Ramazan ayını ukrayin musulman cemiyeti ve qırımtatar halqı böyle şaraitlerde, qolay olmağan, zor şaraitlerde qarşılay – Rusiye istilâsı şaraitlerinde, Rusiye darbeleri şaraitlerinde. Kelecek sene Ramazan barışıq içinde olmasını pek isteymiz. Ve şimdi telükede olğan, cenkte olğan bütün halqlarğa tileymiz", – dep ayttı prezident.
Qırımtatar halqınıñ lideri Mustafa Cemilev işğalde qırımtatarlar Ukrayinağa sadıq qala, dep qayd etti.
"Çeşit menbalardan alğan malümatımızğa köre, Qırımnıñ tamır halqınıñ 90 fayızından ziyadesi – diger malümatqa köre ise, 95-96 fayızı – Rusiyeniñ toqtamağan propagandası ve işğalcilerniñ cezalayıcı tedbirlerine baqmadan, memleketine sadıq qala, Ukrayina Silâlı Quvetleriniñ muvafaqiyetli olması içün dua ete", – dedi Cemilev.
Devlet iftarı ananesi Ukrayina prezidenti tarafından 2023 senesi başlatıldı ve o vaqıttan berli resmiy seviyede keçe.