Ukraina prezidentiniñ Qırım Muhtar Cumhuriyetindeki temsilciligi Qırımdaki Rusiye mahkemesiniñ «Hizb ut-Tahrir davalarından» biriniñ mabüsi Aleksandr Sizikovnı ekspertiza keçirmek içün psihiatrik hastahanege yatqızmaq qararını izaatladı. Müessise, qırımlını «qurtarmağa» tırışacaq, dep qayd etti.
Bu malümat temsilciklikniñ resmiy saifesinde derc etilgen.
«Qırımdaki siyasiy mabüsler mecburiy psihiatrik ekspertizağa sıq-sıq oğratılğan edi. Eñ belli adiselerden biri 2016 senesi Qırımtatar Milliy Meclisiniñ reis muavini İlmi Umerovnıñ mahkeme-psihiatrik ekspertiza bölügine yatqızuv oldı. Onı em Ukraina, em halqara ortaqları tarafından Rusiye Federatsiyasına qarşı yapılğan küçlü siyasiy basqı yardımınen onı azat etip oldılar. Bugün Ukraina Aleksandr Sizikovnı da ceza psihiatriyasından qurtarmaq içün elinden kelgenini yapacaq», – dep bildirdi Ukraina prezidentiniñ Qırım Muhtar Cumhuriyetindeki daimiy vekiliniñ muavini Tamila Taşeva.
Müessise qayd etkenine köre, Qırım Muhtar Cumhuriyeti ve Aqyar Milliy politsiyası 2020 senesi iyül ayından berli Qırımda Sizikovnıñ qanunsız şekilde taqip etilgenini tahqiq ete.
Rusiye kontrolindeki Aqmescitniñ Kiyev rayon mahkemesi oktâbrniñ 14-nde Bağçasaraydaki «Hizb ut-Tahrir davasınıñ» mabüsi Aleksandr Sizikovnı Aqyar şeer psihiatrik hastahanesine mahkeme-psihiatrik ekspertizasına bir ayğa yollamağa qarar aldı.
Tintüvler iyülniñ 7-nde saba erte yedi qırımlınıñ evinde keçirildi: Qurman rayonınıñ Büyük Onlar qasabasında yaşağan Emil Ziyadinov, Aqmescit rayonınıñ Kurtsı qasabasında yaşağan İsmet İbragimov, Bağçasaray rayonınıñ Jeleznodorojnoye köyünde yaşağan Seyran Hayretdinov, Bağçasaray rayonınıñ Sevastyanovka köyünde yaşağan Aleksandr Sizikov, Aqmescit rayonınıñ Bavurçı (Kamenka) qasabasında yaşağan Vadim Bektemirov ve Aluştada yaşağan Dilâver Memetovnıñ evinde.
Rusiye FSBsiniñ malümatına köre, «Qırım sakinleri arasında terror mefküresini yayğan, qırımlı musulmanlarnı özüne celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı.
İyülniñ 7-nde Rusiye kontrolindeki Aqmescitniñ Kiyev rayon mahkemesi «Hizb ut-Tahrir» teşkilâtını qurğanından şübheli sayılğan Sizikovnı ev apsine yolladı. Sizikov birinci derece saqatı olı, 2009 senesi soqurlaştı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
