Ukraina prezidenti Volodımır Zelenskıy Türkiye Tış işler naziri Mevlüt Çavuşoğlu ve Türkiye milliy mudafaa naziri Hulusi Akar ile körüşip, Qırımnıñ Rusiye ilhaqını tanımağanları içün teşekkürler bildirdi. Bu aqta Ukraina prezidentiniñ matbuat hızmeti haber ete.
«Ukraina suvereniteti ve topraq bütünligini daima qoruğanıñız, Ukrainağa ait Qırım yarımadasınıñ qanunsız işğalini tanımağanıñız içün Türkiyege minnetdarım. Qırımtatarlarğa qol tutqanıñız içün teşekkürler bildirem», – dedi Zelenskıy.
Türkiye memurları Ankaranıñ Qırım meselesinde fikri deñişmey, dep bildirdi.
Ukraina prezidenti Türkiye tarafınıñ «Qırım platformasınıñ» işine qoşulmağa azır olğanı içün teşekkürler bildirdi.
Türkiye tarafı, resmiy Ankara Ukraina topraq bütünligi ve suverenitetine bütün platformalarda qol tutacaq, Qırımda qırımtatar halqınıñ aqlarını qorumağa devam etecek, memleket içinde köçip kelgen insanlarnıñ yerleşmesine yardım etecek, Qırım ve Rusiyede qanunsız tutulğan Ukraina vatandaşlarınıñ azat etilüvine yardım etecek, dep tasdıqladı.
Ukraina akimiyeti AB ve Ğarp memleketlerini Yarımadanı işğalden qurtaruv Qırım platformasında iştirak etmesine faal sürette celp ete. Tış işler naziri Dmıtro Kuleba, Qırımnı işğalden qurtaruv sammitini Kyivde 2021 senesiniñ mayıs başında ötkermege planlaştırıla, dep bildirdi.
