Ukraina prezidenti Volodımır Zelenskıy qırımtatarlarnı Qırımtatar bayraq kününen tebrikledi. Bu aqta Ukraina devlet yolbaşçısınıñ hayırlav mektübinde aytıla. Onı Qırımtatar Milliy Meclisiniñ reisi Refat Çubarov derc etti.
«Rusiyeniñ Qırım yarımadası – qırımtatar halqınıñ vatanınıñ – işğali şaraitlerinde bu kün daa da aktual oldı. Rusiye insan aqları ve serbestligini bozıp, milliy ve diniy sebeplerden ayırım kerçekleştirip, onıñ kimligini yoq etecek ola», – dep aytıla Zelenskıynıñ metninde.
Onıñ qayd etkenine köre, #LiberateCrimea halqara aktsiyası sayesinde daa çoq insan onı qırımtatar halqınen bağlaycaq. Mezkür aktsiya çerçivesinde qırımtatar bayrağı dünyanı dolaştı.
«Bayraqta dünyanıñ çeşit köşelerinde yazılğan qoltutuv ve tilek sözleri Qırım Ukraina olğanını daa bir kere isbatlay», – dep aytıla Ukraina prezidentiniñ hayırlav metninde.
Bugün Qırımda Qırımtatar bayraq kününe bağışlanğan avtoyürüş devam ete. Faaller marafonnıñ üçünci kününi Kefede başladı, o, aqşam Aq Qayada yekünlenecek.
Avtoyürüş çerçivesinde faaller meskün yerlerniñ adları ile levhalarnı vaqtınca deñiştire. Sızılğan rus yazı üstüne qırımtatarca tarihiy ad qoyula.
Qırım.Aqiqat mühbiriniñ bildirgenine köre, Rusiye quvetçileri avtoyürüş iştirakçilerini toqtata. Rusiye politsiyası bu malümatnı izaatlamay.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
