Ukraina prezidenti Volodımır Zelenskıy iyülniñ 13-nde Herson vilâyetine barıp, infrastruktura ve «Çonğar» keçiş noqtasındaki memuriy sıñırnı keçüv şaraitlerini baqacaq. Bu aqta Ukraina prezidenti Ofisiniñ saytında haber etile.
Qayd etilgeni kibi, Zelenskıy «Çonğar» ve «Kalançak» keçiş noqtalarını donatuv leyhalarını kerçekleştirüv meseleleri boyunca toplaşuv keçirecek.
«Prezident Herson viyaleti devlet memuriyetiniñ yañı tayinlengen yolbaşçısı ve Ukraina prezidentiniñ Qırım Muhtar Cumhuriyetindeki daimiy vekilini taqdim etecek», – dep aytıla haberde.
Hatırlatamız, iyünniñ 25-nde Anton Korineviç Ukraina prezidentiniñ Qırım Muhtar Cumhuriyetindeki daimiy vekili vazifesine tayin etildi. Prezident temsilciliginiñ resmiy saytında buña dair buyruq derc etildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
