Ukraina prezidenti Volodımır Zelenskıy, Normandiya Dörtlügi çerçivesinde Rusiye tarafından ilhaq etilgen Qırımnıñ işğalden boşatılması ile bağlı muzakere protsessiniñ qıyınlığını qayd etti ve bu meseleni kötermek içün başqa bir "qaviy platforma" olmaycağını qoştı. Bunı o Euronews kanalına bergen intervyüsinde ayttı.
"Qırımğa kelgende, mence, vaziyet daa mürekkeptir. Kerçekten aytsam, bunıñ aqqında çoq tüşündim. "Normandiya formatında" kimse Qırım aqqında laf etmege istemey, mıtlaqa da Rusiye. Men bu meseleni köterdim. Amma bütün vaqıt Donbassnı muzakere ettik. Rusiye bunıñ aqqında laf etmege istemey, epimiz bunı añlaymız", - dedi Zelenskıy.
Onıñ aytqanına köre, bu meseleniñ muzakere etilmesi içün şimdilik "ciddiy meydançıq" yoq.
"Amma Qırım - bu bizim toprağımız. Biz onı qaytarırmız. Amma Qırımnıñ qanunsız ilhaqı sebebinden Rusiyege qarşı sanktsiyalar kirsetken ve basqı yapqan halqara muzakere ve añlaşmalarımıdan ğayrı, bu meselenin muzakeresi içün ciddiy ve semereli meydançıq yoq. Sabıq prezident ilerilegenimizni ve Qırımnı qaytarmaq içün çoq iş becergenimzni ayttı. Kerçekten, mahkeme protsessleri bar, halqara añlaşmaları bar. Amma sizge samimiy aytayım - şimdilik bu meseleni kötermek içün qaviy platforma yoq", - qoştı Zelenskıy.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
