Ukraina prezidenti Volodımır Zelenskıy, Qırım ilhaqı aqqında aytqanda, "yarımadanı bermege mümkün degil edi", dep ayttı. O emin ki, bunda çoq adam iştirak etti ve olar "cevap bermeli".
Bunı Zelenskıy Euronews haber agentligine intervyü bergende aytttı. Onıñ bir qısmı avgust 26-sında Ukraina prezidentiniñ Ofisiniñ saytında derc etilgen edi.
Malümatta bildirilgeni kibi, prezidentniñ fikrince, Qırım yarımadasını işğalge qolaylıqnen bergenler cevap bermeli.
"Qırımnı bermek mümkün degil edi. Bu büyük bir problemadır. Amma bugün onıñ nasıl yapılğanı aqqında laf etmege keçtir. Eminim ki, bir vaqıtları er ker cevap berecek. Bunda çoq adam iştirak etti", - qayd etti Zelenskıy.
Aynı intervyüde Ukraina prezidenti Volodımır Zelenskıy, Normandiya Dörtlügi çerçivesinde Rusiye tarafından ilhaq etilgen Qırımnıñ işğalden boşatılması ile bağlı muzakere protsessiniñ qıyınlığını qayd etti ve bu meseleni kötermek içün başqa bir "qaviy platforma" olmaycağını qoştı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
