Ukraina prezidenti Volodımır Zelenskıy Rusiye prezidenti Vladimir Putin ile soñki subetinde, Qırımda apis etilgen 22 qırımtatarnıñ azat etilmesi meselesini köterdi, bildirde Ukraina prezidenti Ofisiniñ başı Andriy Yermak.
Nu malümat avgust 7-sinde Ukraina prezidenti Ofisiniñ saytında yerleştirildi.
"Bu cedvel artıq Rusiye tarafına berildi. Bu meseleniñ çezilmesini bekleymiz", - dedi Yermak.
O hatırlattı ki, Volodımır Zelenskıy, şimdi SİZOda tutulğan ve 3 yaşındaki oğlu vefat etken Ruslan Süleymanovnıñ cenazege yiberilmesini rica etti.
Yermak, Üç taraflı alâqa gruppasınıñ oturışlarında deñişüv cedvelleri tasdıqlanacaığına ümütini bildirdi.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
