Ukrain delegatsiyası ABD prezidenti Joseph Bidenge Qırım ve Donbasta qanunsız esir etilgenlerniñ cedvelini berdi. Cedvelde 450 adam. Bunı sentâbrniñ 1-nde Vaşingtonda eki taraflı körüşüv vaqtında Ukraina prezidenti Volodımır Zelenskıy bildirdi.
Zelenskıy, olarnıñ azat etilmesi içün Amerika prezidentinden yardım istedi.
«Saba siziñ taqımıñızğa Donbasnıñ işğal etilgen qısmında, muvaqqat işğal etilgen Qırımda, Rusiyede esir etilip tutulğanlarnıñ cedvelini berdik. Anda tahminen 450 adam. ABD bu meseleniñ çezilmesinde nasıl etip yardım ete bile», – dedi Zelenskıy.
Zelenskıy Vaşingtonğa avgustnıñ 30-nda kelip çıqtı. Anda üç kün bulunacaq. Artıq ukrain delegatsiyasınıñ vekilleri ile beraber bir qaç körüşüv keçirdi. Avgustnıñ 31-nde, Ukraina ve ABD strategik mudafaa aqqında çerçive añlaşmanı imzalağanını ayttı. Sentâbrniñ 1-nde ise Ukraina ve ABD devlet başları arasında körüşüv olıp keçmek kerek.
Evel, Ukraina ombudsmanı Lüdmila Denisova, Volodımır Zelenskıy Joseph Biden ile körüşüvde Donbas ve Qırımda esir etilgen ve bellisiz ğayıp olğan ukrainlerniñ cedvelini berecegini bildirgen edi.
Sentâbrniñ 1-nde Ukraina prezidenti Volodımır Zelenskıy Amerika devlet başı Joseph Biden ile körüşüvni Qırım ve Donbas mevzusından başlamağa istey.
