Ukraina prezidenti Volodımır Zelenskıy Donbastaki vaziyetnen bağlı normand formatı devletleri liderleriniñ siyasiy mesleatçılar körüşüviniñ tafsilâtlarını bilmey, dep bildirdi. Bu aqta Azatlıq Radiosı haber ete.
Körüşüv iyülniñ 3-nde Berlinde oldı. Ukraina tarafından Prezident ofisiniñ reberi Andriy Yermak ve işğal altındaki topraqlarnıñ reintegratsiya meseleleri naziri, baş nazir muavini Oleksiy Reznıkov iştirak ettiler.
Zelenskıy iyülniñ 4-nde Odesa vilâyetinde olğanda jurnalistler Rusiye Ukrainadan Donetsk ve Lugansk vilâyetleriniñ ayrı rayonlarınıñ ayrı statusı aqqında anayasa deñişmeleriniñ leyhasını taqdim etmesini talap etkeni doğrumı, dep soradı. Bu aqta Almaniya kütleviy haber vastaları bildirdi.
«Kimse Ukrainadan bir şey talap etip olamaz. Biz – mustaqil memleketmiz, er kes ritorika üzerinde çalışmalı. Körüşüvni aytsaq, açıq aytayım: azır degilim. Körüşüv bir qarar oldı, meselenen bağlı», – dedi Zelenskıy.
Onıñ bildirgenine köre, körüşüvnen bağlı bir tafsilât bilmey, birazdan Yermak ve Reznıkovnen toplaşuv yapacaq.
Prezident çıqışında olğan Yerman 11 saat devam etken muzakereler aqqında aytmadı. Daa evel normand formatı devletleriniñ liderleri siyasiy mesleatçılarınıñ iyülniñ 3-nde Berlinde olğan körüşüvi Ukraina, Frenkistan, Almaniya ve Rusiye liderleri sammitiniñ Berlinde keçirilüvini yaqınlaştırdı.
Parijde dekabrniñ 9-nda Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Volodımır Zelenskıy Rusiye zenaatdaşı Vladimir Putinnen Qırım meselesini laf etmege azırlanğanını bildirdi, amma eki taraflı körüşüvde buña sıra kelmegen. Parijdeki körüşüv arfesinde Rusiye prezidentiniñ matbuat kâtibi Dmitriy Peskov, Putin Ukraina prezidentiniñ Qırımnıñ kimge ait olğanını muzakere etmeycek, dep bildirdi.
