Ukraina prezidenti Volodımır Zelenskıy emin ki, Qırımnı işğalden qurtaruv meselesi halqara meydançığı telükesizlikni ve qırımlılarnıñ aqlarını qorumaq içün kerek. Bu aqta o, Avropa parlamentiniñ deputatlarınen yapqan videokonferentsiya vaqtında ayttı, dep bildire Prezident ofisiniñ matbuat hızmeti.
«İqtisadiyat, paradan ğayrı, bizim içün geopolitik destek müimdir. Ayrıca Qırım platformasınıñ peyda oluvı ve teklifimizni aytmağa isteymiz. Bu meydançıqta müim gumanitar meselelerni, bütün ukrainalılar – Qırımda apiske alınğan ve Rusiyede bulunğan qırımtatarlar, ukrainlerge yardım etüv meselelerini muzakere ete bilecekmiz. Bu vatandaşlarnıñ qaytuvı, azat etilüvi, em de Qırımnıñ işğalden qurtarıluvını muzakere etecekmiz», – dep bildire Zelenskıynıñ aytqanlarını onıñ matbuat hızmeti.
Onıñ qayd etkenine köre, Ukrainanıñ Avropa Birligi siyaseti eskisinden daa aktualdir. «Bugün Avropa Birliginiñ destegi Ukraina içün pek müim ola», – dep qoştı o.
Ukraina Tış işler nazirligi, Qırımnı işğalden qurtaruv platforması nasıl olacağını aydınlattı. Müessisede Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar.
Ukraina prezidenti Volodımır Zelenskıy BM Baş Assambleyasınıñ 75-inci sessiyasınıñ umumiy munaqaşalarında çıqışta bulundı. O, Qırımda insan aqları vaziyetine dair yañı qararğa qol tutmağa ve yarımadanı işğalden qurtaruv halqara Qırım platformasınıñ qurulışında iştirak etmege çağırdı.
Ukraina Tış işler naziri Dmıtro Kuleba, onıñ nazirliginde Volodımır Zelenskıy içün Qırımnı işğalden qurtaruv muzakereleri içün halqara platformasını quruv teklifi azır, dep bildirgen edi.
Bundan evel Kulebanıñ qayd etkenine köre, Ukraina, Qırımnı işğalden qurtaruv halqara platformasınıñ liderlerinden biri Poloniya olacaq, dek bekley. O, Qırımnı işğalden qurtaruv meselesi boyunca halqara meydançıq işinde Rusiyeni körmey, dep aytqan edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
