Ukraina prezidenti Volodımır Zelenskıy, 11 ukrain siyasiy mabüsine Levko Lukyanenkonıñ adına stipendiyasınıñ tayinlemesi aqqında fermannı imzaladı, dep bildirile devlet başınıñ saytında.
"Qanunsız apiste tutulğan müddetke ve azat etilüvden soñ daa bir yılğa devlet stipendiyasını böyle kişilerge tayinlemek: Aleksey Bessarabov, Valentin Vıgovskiy, Pavlo Ğrıb, Volodımır Dudka, Mıkola Karpük, Stanislav Klıh, Oleksandr Kölçenko, Yevğen Panov, Aleksey Sızonoviç; bir yıl müddetine: Ğenadiy Afanasyev Yuriy Yatsenko", - denile beyanatta.
2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı. Rusiye nezareetindeki Aqyar şeer mahkemesi 2019 senesi aprel 4-ünde "ukrain diversantları" davasınıñ" iştirakçileri Vladimir Dudka ve Aleksey Bessarabovğa 14 yıllıq apis cezasını üküm etti.
2016 senesi avgust ayında Rusiye Federal havfsızlıq hızmeti (FSB) ilhaq etilgen Qırımda «ukrain diversantları» yaqalanğanını ilân etken edi, olar yarımadada terakt kerçekleştirmege azırlanğan ekenler. Tutulğanlar belli bir müddet devamında Moskvanıñ Lefortovo SİZOsında olıp, Qırımğa ketirilgen edi.
2018 senesi iyülniñ 13-nde Kreml kontrolindeki Qırım Yuqarı mahkemesi Panovnı 8 yıl sert rejimli koloniyada qalmasına üküm etti. O, tahqiqat ile kelişmege razı olmadı.
Ukraina vatandaşları Oleg Sentsov, Aleksandr Kolçenko, Gennadiy Afanasyev ve Aleksey Çirniyni Aqmescit şeerinde 2014 senesi mayıs ayında Rusiye Federal telükesizlik hızmeti yaqaladı. Olarnı Qırımnıñ Rus cemaatı ofis qapusı ve «Yekâne Rusiye» fırqasınıñ ofis pencerelerini ateşke bermesinen qabaatladılar. Bu areketler Rusiye taqiqatı tarafından «terrorizm» olaraq tanıldı.
