Ortaq telükesizlik añlaşma teşkilâtı Qazahistan prezidenti Kasım-Jomart Tokayevniñ talabınen memleketke askerlerni yollaycaq. Bu aqta teşkilâtnıñ ortaq telükesizlik şurasınıñ yolbaşçısı olğan Ermenistan baş naziri Nikol Paşinân Facebookta bildirdi.
Tokayev, çarşenbe aqşamı OTAŞ memleketlerinden küç yardımını istedi. Paşinânnıñ aytqanına köre, OTAŞ ortaq telükesizlik şurası «bu memlekette stabilleşüv ve vaziyetni normalleştirüv maqsadınen sıñırlı bir müddetke» barıştırıcı küçlerni yollamağa qarar berdi.
Tasdıqlanmağan malümatqa köre, Rusiye arbiylerni Qazahistanğa yolladı: Orenburg civarındaki arbiy uçaq alanında mahsus uçaq azırlanıla. Bundan ğayrı, Qazahistanğa al-azırda Kamensk-Şahtinskiy şeerinde bulunğan 11 ayrı seymen müendis brigadasını yollay bileler.
OTAŞ azaları Rusiye, Ermenistan, Beyazrusiye, Qazahistan, Qırğızistan ve Tacikistan ola. Barıştırıcı missiyanıñ erkânı çarşenbe aqşamı daa aydınlatılmağan edi.
Qazahistandaki qalabalıqlar sebebinden Rusiye prezidenti Vladimir Putin Beyazrusiye prezidenti Aleksandr Lukaşenko ve Qazahistan prezidenti Kasım-Jomart Tokayevnen telefonda laf etti. Bu aqta yanvarniñ 5-nde Lukaşenkonıñ matbuat hızmeti haber etti.
Qazahistanda dört künden berli onlarnen şeerde kütleviy narazılıq aktsiyaları devam ete. Mitingler şingen gaz fiyatlarınıñ birden artması sebebinden başlandı, amma pek tez siyasiy meselege çevirildi.
