Qırımdaki Qarasuvbazar suv anbarı qışqa yaqın faydalı köleminiñ büyük qısmını ğayıp ete bile, çünki Kahovka suv elektrik stantsıyası yıqılması neticesinde Şimal Qırım kanalınıñ virane alına kelmesinden soñ rusiyeliler şiddetli şekilde suvnı boşatmağa başladı. Bunı Ukrayina prezidentiniñ Qırım MC daimiy temsilciligi bildirdi.
"İşğal etilgen Qırımda Qarasuvbazar suv anbaraı keskin şekilde saylaşa. Kahovka suv elektrik stantsıyası patlatılması neticesinde Şimal Qırım kanalınıñ virane alına kelmesinden soñ işğalciler şiddetli şekilde suvnı boşatmağa başladı. Eger böyle devam etse qışqan yaqın suv anbarı faydalı köleminiñ büyük qısmını ğayıp ete bile", - dep yazıla bildirmede.
Evel yerli sakinler Qırım.Aqiqatqa Qarasuvbazar suv anbarından suv kettikçe azlaşqanı aqqında bildirgen ediler. Sebep avgust ayındaki sıcaqlıqtır ve Kahovka suv elektrik stantsiyasınıñ yoq etilmesinde soñ suvsız qalğan Şimal-Qırım kanalını toldurmaq içün suv anbarından Büyük-Qarasu özenine suvnıñ aqtarılmasıdır.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Rusiye tayin etken Qırım yolbaşçısı Sergey Aksönov Qırımnıñ iç ihtiyacları içün yeterli qadar suv olğanını ayta.Aynı zamanda onıñ sözlerine köre, Şimal Qırım kanalında suvnıñ seviyesi kettikçe eksile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
