Yarımada işğalden azat etilmezden evel Qırım arbiy memuriyetiniñ yolbaşçısı içün namzetni saylamağa istey, dep bildirdi Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva«UP» içün yazğanlarında.
«9 yıl devamında işğal altında olğan serbest Qırımda iş olacağı içün mütehassıslarnıñ belli bir azırlığı olmaq kerek, böyle şaraitlerde çalışmaqnıñ hususiyetleri köz ögüne alınmalı. Mında idarecilerniñ qoşma ögrenüvini hatırlatmaq kerek», – dep qayd etti o.
Memurnıñ bildirgenine köre, bu maqsadnen Ukrayına prezidentiniñ temsilciligi ortaqlarınen beraber Qırımda çalışacaq devlet hadimleri ve yerli idare organlarınıñ hadimleri içün online kurs ve tasil programmalarını azırlay.
Bundan ğayrı, Ukrayına prezidentiniñ Qırımdaki temsilciligi Taras Şevçenko Kyiv milliy universitetinen beraber «Zıddiyetten soñraki idare» ve «Cenkten soñraıki topraqlarda ükümet» magistr programmalarını azırladı.
Taşevanıñ qayd etkenine köre, programmalarnıñ missiyası işğalden azat etilgen topraqlarda idare faaliyeti içün küçlü hadimlerni azırlamaq ve işğal aqibetlerini yeñmek ola.
Taşeva, işğal etilgen Qırımda akimiyet organları içün hadimler yedegi 50 biñ insan olacaq, dep bildirdi.
Ukrayınanıñ vaqtınca işğal etilgen topraqlarınıñ reintegratsiyası nazirniñ muavini Anatoliy Stelmah telükesizlik teminlevi, Rusiye arbiy bazalarınıñ askeriysizleştirilüvi, devlet hainleriniñ mesüliyetke çekilmesi, akimiyet organlarınıñ ğayrıdan tiklenmesi, malümat telükesizliginiñ teminlevi – yarımada işğalden azat etilgen soñ Ukrayınanıñ ilk adımlarıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
