Büyük cenk başlanğandan berli Qırımdan eñ az 38 rus askeriniñ esir alınğanı tasdıqlanğan. Bunı Ukrayina prezidentiniñ Qırım MC daimiy temsilciligi haber etti.
"Dekabrniñ 11-nde mevcut olğan malümatqa köre, işğal etilgen Qırımdan eñ az 38 RF arbiyi esir alınğanı tasdıqlanğan. Büyük ihtimalnen, olarnıñ çoqusı Ukrayina vatandaşıdır", - dep yazıla bildirmede.
Bundan ğayrı Qırımda eñ az 605 rus askeri defin etildi, olardan büyük ihtimalnen 460-ı Ukrayina vatandaşı. Elâk olğan ve defin etilgenlerniñ sayısı daa ziyade ola bile, çünki olarnıñ büyük qısmı gizli yapıla.
Temsilcilikte qayd etkenleri kibi, büyük ğayıplar sebebinden Aqyarda yañı gospital qurula eken. Sığımlığı 150 adam olması planlaştırıla. Gospital faaliyetke 2024 sensi ketirilmek kerek.
Soñki sefer RF Mudafaa nazirligi ordusınıñ ğayıpları aqqında 2022 senesi sentâbr ayında malümat bergen edi. O zaman 5 937 asker ölgeni haber etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
