Ukraina prezidenti namzeti, Lviv şeer yolbaşçısı Andriy Sadovıy Ukraina prezidenti saylavlarında namzetini köstermekten vazgeçkenini ve diger namzet Anatoliy Grıtsenkoğa qoltutacağını bildire.
«Prezident saylavlarından öz namzetimni keri çekem ve Anatoliy Grıtsenkoğa qoltutqanımnı bildirem. Bu şartsız bir destek degil. Kelecek aftanıñ başında açıq añlaşma imzalap, müim yerlerni qayd etecekmiz. Devletimizniñ mudafaası ve telükesizliginen bağlı printsipler, habarcılıq ile küreş, işğal etilgen topraqlar, siyasiy vazifelerniñ temizligi», – dep ayttı Sadovıy martnıñ 1-nde Kyivde.
Ukraina prezidenti namzeti Anatoliy Grıtsenko saylav kampaniyasınıñ diger iştirakçisi, Lviv şeer yolbaşçısı Andriy Sadovıy ile körüşkenini tasdıqladı. Grıtsenko «bir qarar alınğanda» munaqaşa neticelerini aydınlatmağa vade etti.
Ukrainadaki prezident saylavlarınıñ keçirilmesi martnıñ 31-ne planlaştırıla. Merkeziy saylav komissiyası 44 namzetni qayd etti.
