Ukraina prezidentiniñ ofisi Qırımtatar Milliy Meclisini Suriyedeki ukrainalılar mevzusını «siyasiyleştirmemesine» çağırdı. Müessise, Suriyede olğan Ukraina vatandaşlarınıñ qaytması içün diplomatlar, mahsus hızmetler ve istihbarat çalışalar.
Qırımtatar Milliy Meclisiniñ reisi Refat Çubarovnıñ beyanatına cevap bergen Prezident ofisi «Meclis vekilleri Ukraina vatandaşlarınıñ sıcaq yerlerden qaytması içün yapılğan faaliyet aqqında tafsilâtlı malümat bilmey», dep qayd ete.
«Bu regionda, IŞİD tarafından kontrol etilgen yerlerde, olğan er bir yetişkenniñ ayrı ikâyesi bar, onı terenden ögrenmeli. Bundan ğayrı, vatandaşlarımıznı «El-Holl» lagerinden tahliye etmek içün Ukrainanıñ mahsus organları bir sıra tedbir ala, hususan sessiz, telükesizlik vaziyeti monitoring etile ve tahliye etüv yolları qıdırıla», – dep bildire Prezident ofisi.
Berilgen malümatqa köre, mahsus hızmetler vatandaşlarnıñ tek çetelde degil, memleket içindeki telükesizligine de emiyet bermeli. Prezident memuriyeti Suriyede bulunğan ukrainalılarnıñ ekseriyeti işğal etilgen Qırım sakinleri ola ve anda tuvğanları bar, dep qayd ete.
«Vatandaşlarımıznıñ Suriyede bulunğanına dair malümatnıñ aydınlatılması Rusiye mahsus organları tarafından tuvğanlarınıñ ve Qırımda bağda olğan insanlarnıñ tutulmalarına, basqı yapılmasına yol aça bile», – dep tüşüne Prezident ofisi.
Müessise, Meclisni «Ukraina istihbaratı, mahsus hızmetleri ve diplomatlarınıñ işini siyasiyleştirmemesine» çağırdı. Aynı vaqıtta, Ofis qırımtatarlarnıñ temsilcilerinden olarğa ait meselelerde, hususan Qırım platformasınıñ qurulmasında, faal iş yapacağını bekley.
Refat Çubarov, Prezident ofisi derc etken cevapnı «80-ıncı yıllarnıñ TASS üslübi mesacı» dep adlandırdı.
Meclis reisi, Ukraina akimiyetini Suriyedeki «El-Holl» qaçaqlar lagerinde bulunğan yüzge yaqın qadın ve balanı vatanğa qaytarmasına çoq çağırğan edi.
Çubarovnıñ 2019 senesi mart ayında bildirgenine köre, 21 qadın ve 54 bala – Ukraina vatandaşları – Suriyede «viran etilgen infrastrukturalı zor şaraitlerde» buluna ve Ukrainağa qaytmaq içün yardım istey.
Suriyede 2011 senesinden berli vatandaş cenki devam ete, onıñ neticesinde tahminen 400 biñ kişi elâk oldı.
