«Pravıy sektor»da rejissör Sentsovnıñ olarğa alâqası olmağanını qayd ettiler

Rejissör Оleg Sentsov «Pravıy sektor» cemaat teşkilâtınıñ ve siyasiy firqasınıñ azası iç bir vaqıt degil edi.

Bunı Azatlıq Radiosınıñ efirinde «Pravıy sektor»nıñ icra komitetiniñ reisi Andriy Bondarenko bildirdi. O, mütenasip vesiqanı da kösterdi.

«Оleg Sentsov iç bir zaman «Pravıy sektor»nıñ bölüklerine bağlı degil edi. Cemaat teşkilâtımıznıñ ve siyasiy firqamıznıñ azası degildir», – dedi Bondarenko ve rejissörnı «Pravıy sektor» ile bağlamaq ıntıluvlar «uydurılğan bir şey ve aqiqatqa iç te uymağanını» ayttı.


Bondarenko köstergen vesiqa, onıñ sözlerine köre, Sentsovnıñ adliyecisine ve Rusiye akimiyet organlarına berilecek.

Oleg Sentsovnı ve Ukrainanıñ daa üç vatandaşını Rusiye FSB hadimleri Qırımda mayıs ayında yaqaladılar. Gennadiy Afanasyevni, Aleksey Çirniyni, Aleksandr Kolçeni ve Sentsovnı Yalta, Aqmescit ve Aqyarda teraktlarnıñ azırlanuvında qabaatlaylar. Episini «Pravıy sector» teşkilâtınıñ azası olaraq adladılar.


Oleg Sentsovnı azat etmek talapları ile Rusiye prezidentine belli kinorejissörlar Pedro Almodovar, Bertran Tavernye, Ken Louç, Ancey Vayda, Kşiştof Zanussi ve digerleri muracaatta bulundılar.

Oleg Sentsov 2011 senesi «Gamer» filmni çıqardı, o Rotterdam kinofestivalniñ programmasına kirgen edi. Keçken sene «Nosorog» filmniñ leyhası içün mukâfat aldı.

Sentsovnıñ eki çağına yetmegen balası bar.