Çehiyanıñ paytahtında Qırım.Aqiqat (Azatlıq Radiosınıñ Ukrayina hızmeti) leyhasınıñ "Sessiz sürgünlik" vesiqalı filminiñ resmiy numayışı olıp keçti. "EVALD" kinoteatrine Çehiyada yaşağan ukrayinalılar, çehler ve qırımtatarlar keldi.
Film ilk sefer çeh seyircilerine çeh tilinde subtitrlernen kösterildi.
Körüşüvniñ teşkilâtçıları — Azatlıq Radiosı ve "Şedrik" teşkilâtı, Olomoutsk vilâyetiniñ ukrayin cemiyeti. Onıñ reberi Yuliya Krasilenkonıñ aytqanına köre, film 1944 senesi qırımtatarlarnıñ sürgünligi ile ince qıyaslamalar yapa.
"Bu tesirli vesiqalı film Avropanıñ farqlı köşelerine ve işğal etilgen Qırımğa tarqalğan altı qırımtatarınıñ taqdirini añlata. Olar "gibrid sürgünlik" dep adlandırğan repressiyalarnıñ yañı dalğası, 1944 senesi sovet diktatorı İosif Stalinniñ zamanında qırımtatarlarnıñ kütleviy sürgünliginiñ teren tarihiy travmasınıñ yankısını taşıy, ve bütün vesiqalı film qırımtatar sürgünliginiñ 80 yıllığı arfesinde bu vaqia ile ince parallellerni keçire", — dep tarif etti Yulia Krasilenko filmniñ Pragada kösterilüvi vaqtında.
Tedbirde şimdi Çehiyada yaşağan qırımtatarı Eldar Emiruseinov da iştirak etti. Onıñ aytqanına köre, dünyada er kes "Rusiye onıñ halqını ne qadar taqip etkenini" bilmeli.
"Bugün qırımtatarlar Qırımnıñ tamır halqı işğal altında nasıl yaşağanını ögrenmek içün kelgen er keske pek minnetdarım. Bu filmni çıqarğan Azatlıq Radiosınıñ jurnalistlerine de minnetdarım. Er kes Rusiyeniñ halqımnı taqip etmege devam etkenini bilmeli", — dep tarif etti Eldar Emiruseinov.
Qırım.Aqiqatnıñ (Azatlıq Radiosı) "Sessiz sürgünlik" vesiqalı leyhası qırımtatarlar Qırımdan nasıl sürgün etilgenleri, Rusiye qırımtatarlarnı kene nasıl evsiz qaldırğanı aqqında film. Ne içün qırımtatarlar öz vatanlarını kütleviy surette terk etmege mecbur, ne içün Qırım yarımadasınıñ tamır halqına 1944 senesi sovet akimiyeti qırımtatarlarnı zorbalıqnen yük vagonlarında alıp ketken kibi, başqa çare qaldırmaylar.
Qaramanlar öz ayat ikâyelerini, Rusiye tarafından ilhaq etilgen Qırımnı nasıl terk etkenlerini, neler yaşadıqlarını, ne içün qalmağa imkânları olmağanını, şimdi qayda ve nasıl yaşağanlarını ve Qırımğa qayta bileceklerini ikâye ettiler.
Filmde film qaramanlarınıñ şahsiy arhivlerinden unikal kadrlar qullanıldı, olarnıñ bir qısmı ilk sefer derc etile. Çıqaruvlar Poloniya, Almaniya, Belçika, Türkiye, Ukrayina ve işğal etilgen Qırımda keçti.
Filmniñ müellifleri: Anjelika Rudenko — jurnalist-redaktor, Dmitriy Julay – rejissör-scenarist, Nikita Isayko — operator, Elvina Seitbullayeva – prodüsser.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
