Salı künü, iyünniñ 29-nda, Pragada «1944. Qırım. Sürgünlik» adlı vesiqalı film kösterildi, dep bildire Azatlıq Radiosı.
Fresh Production Group şirketiniñ rejissörlar Fatima Osman ve Yunus Paşanıñ filmi qırımtatar sürgünligi aqqında bir qaç qorantanıñ ikâyesi vastasınen tarif ete.
Pragadaki Kino Pilotů kinoteatrinde filmni Ukrainanıñ Çeh Cumhuriyeti elçihanesi ve «Belâğa oğrağan insan» çeh gumanitar teşkilâtı kösterdi.
«Adet üzre film ögüne yahşı seyirler tileyler, amma bu sefer sizge bunı tilep olamayım, çünki bu filmni baqmağa bazıda zor, qıyın olacaq», – dep qayd etti levha ğayesiniñ müellifi olğan Ukraina Tış işler naziriniñ birinci muavini Emine Ceppar kiriş sözünde.
Film kösterilüvinen beraber rusiyeli jurnalist Anton Naumlükniñ 2014 senesi yarımada işğalinden soñ qırımtatarlarnıñ taqip etilüvi aqqında «Hırsızlanğan Qırım balalığı» adlı fotoresimler sergisi taqdim etildi.
«Qırımda insan aqlarınıñ bozuluv mevzusı Çeh Cumhuriyetiniñ kün tertibinde qalmalı. Qırımdaki vaziyet pek yaramay. Anda qalğan insanlar, olarnıñ vaziyetleri aqqında aytmaq müim ola», – dep qayd etti Azatlıq Radiosına Nadejda İvanova, «Belâğa oğrağan insan» şarqiy avropa programmasınıñ reberi.
«1944. Qırım. Sürgünlik» filmi 2020 senesi Türkiyede Antakya 8th International Film Festivalde halqara vesiqalı filmler nominatsiyasında ğalebe qazandı, Çehiyada ilk sefer kösterildi.
