Çeh Cumhuriyetiniñ paytahtı Pragada sentâbrniñ 17-nde "Qırım künleri" başladı, olar sentâbrniñ 20-ne qadar devam etecek, dep bildire Ukrayina aq qorçalayıcı teşkilâtları, hususan ZMINA İnsan aqları merkezi.
Teşkilâtçılar haber etkenine köre, "Qırım künleri" Qırımnıñ tarihı ve medeniyetine, şimdiki vaziyeti ve Rusiye işğaliniñ aqibetlerine bağışlanğan medeniy tedbir, kino kösterüvleri, kontsert, munaqaşa ve ekspert körüşüvlerini birleştirecek.
"Yarımada insan aqlarınıñ muntazam sürette bozuluvı, taqip, askeriyleştirüv ve Ukrayina kimligi ve qırımtatar medeniyetini bastıruv ıntıluvlarını köre. İşğal tek Qırım sakinleri içün degil, Avropa telükesizligi, halqara uquq ve insan aqlarınıñ temel imayesi içün bir telüke oldı. Aynı vaqıtta Qırım işğal ikâyesinden daa ziyadesidir. Bu insanlar, medeniyet, metanet ve kimlik ikâyesidir. Şahsiy ikâye, muzıka, aş, sanat ve anane vastasınen ukrayin Qırımı Avropa ve dünyanen bağlı qalmağa devam ete", – dep aytıla haberde.
Teşkilâtçılar taqdim etilgen programma "Qırım işğaliniñ regional istiqrarlıq, halqara adliye ve Avropanıñ daa keniş landşaftına nasıl tesir etkenini kösterecek, dep bildirdi. O, Çehiyanıñ Ukrayinağa köstergen yardımğa diqqat celp eteceke ve ilerideki işbirliginiñ emiyetini qayd etecek".
ZMINA planlaştırılğan tedbirlerniñ cedvelini derc etti, olarnı saytlarında körmek mümkün.
Hatırlatamız, bıltır mayıs ayında Brüsselde "Qırım aftası" keçti – diplomat, Avropa parlamentiniñ deputatlarınıñ iştiraki ile Qırımğa bağışlanğan fotosergi ve kino tedbirleri.