Portugaliyadaki Ukraina diasporası 2016 senesi mayıs ayında Rusiye işğal etken Qırımda hırsızlanğan qırımtatar faali Ervin İbragimovnıñ hatırasına futbol matçı keçirilecek.
Bu aqta Ukraina diasporasınıñ vekilleri Qırım.Aqiqatqa bildirdi.
«Futbol matçını Portugaliyada yaşağan qırımtatar qorantasınıñ teşebbüsi ile teşkil etemiz. Yarın Umer İbragimovnı qarşılaymız. Matçtan ğayrı, cemiyet ve Portugaliya siyasetçilerinen körüşüv olacaq», – dep tarif etti diaspora vekilleri.
Olarnıñ malümatına köre, matç iyünniñ 23-nde Lisabonda yapılacaq. Anda hırsızlanğan qırımlınıñ babası Umer İbragimov ve Qırımtatar Milliy Meclisiniñ reis muavini Ahtem Çiygoz baracaqlar.
Bu Umer İbragimovnıñ iyünniñ 21-nde Kyivde Ukrainanıñ beşinci prezidenti Petro Poroşenko ile keçirgen körüşüvinde belli oldı. Poroşenko mezkür körüşüvni teşkil etmege yardım etti, dep bildire «Avropa birdemligi» ukrain siyasiy küçüniñ matbuat hızmeti.
Bu körüşüvde hırsızlanğan qırımlınıñ babası yarımadanıñ tez vaqıtta işğalden qurtulacağına ümüt etkenini bildirdi.
Bağçasarayda 2016 senesi mayısnıñ 24-nde aqşam şeer şurasınıñ deputatı, Dünya Qırımtatar Kongressi icra komitetiniñ azası Ervin İbragimov hırsızlanğan edi. Onıñ maşinası yol ortasında tapıldı.
Qırımtatar faali Nariman Celâl tutulğanını video nezareti kameraları qayd etti, dep bildirdi. Video uquq qoruyıcı organlarına berildi.
Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.
Qırım Muhtar Cumhuriyetiniñ prokuraturası Ervin İbragimovnıñ ğayıp olmasınen bağlı mahkemeden evel tahqiqat keçirmekte.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
