Ukraina prezidenti Petro Poroşenko ukrain diplomatlarına kelecek BMT Baş Assambleyasınıñ sessiyasına Qırım boyunca yañı rezolütsiya azırlamağa buyurdı.
“Bugün bütün alem Dünya Tamır halqlar kününi qutlay. Ukraina içün bu - rusiye işğalinde yaşağan, qılınma ve zulum çekken qırımtatar halqınıñ taqdiri aqqında hatırlav” , - dep yazdı Poroşenko.
Prezident, Ukraina Qırımnı işğalden qurtarmaq ve qırımtatarlarnıñ aq-uquqları, serbestligini qorçalamaq içün küreşni devam etkenini qayd etti.
“Men, Qırımnıñ statusı çerçivesinde ayın-oyunlarnı toqtatmaq içün, diplomatlarımızğa kelecek BMT Baş Assambleyasınıñ sessiyasına Qırım boyunca yañı rezolütsiya azırlamağa buyurdım. Baş Assambleya endi bir qaç kere, qırımtatarlarnıñ aq-uquqları bozulması içün, Ukrainanıñ noqta-i nazarına qoltuttı, onıñ içün dünya topluluğınıñ fikri deñişmey: “Qırım - bu Ukraina!” - qayd etti devlet başı.
Onıñ aytqanına köre, “tamır halq - qırımtatarlar - serbest ukrain Qırımında ecdatlarınıñ özgün adetlerini kütecek, besleycek” vaqıtını yaqınlaştırmaq içün Ukraina olduqça bütün küç-quvetini qoya.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
