Link açıqlığı

Saatnıñ esas haberi

Poroşenkonıñ temsilciligi Qırımtatar genotsidiniñ qurbanlarını añma kününde bütün bayram tedbirlerini lâğu emtege çağırdı


Qırımtatar sürgünliginiñ 75 yılına bağışlanğan logo
Qırımtatar sürgünliginiñ 75 yılına bağışlanğan logo

Ukraina prezidentiniñ Qırım Muhtar Cumhuriyeti temsilciligi vilâyet devlet memuriyetleriniñ yolbaşçılarına muracaat etip, keçirilmesi Qırımtatar genotsidiniñ qurbanlarını añma kününe planlaştırılğan bütün eglence tedbirlerini başqa künlerge avuştırmağa rica etti. Böyle bir muracaat mayısnıñ 8-nde temsilcilikniñ Facebook saifesinde derc etildi.

«Hatıra kününde Ukraina meydanlarında eglence tedbirlerini keçirmek yañlış ola, dep tüşünemiz. Qırımtatar halqı bugün de yarımadanıñ işğalci akimiyeti yapqan repressiyalarğa baqmadan Qırımda Ukrainanıñ mustaqilligi ve topraq bütünligi oğrundaki küreşni devam ettire», – dep aytıla haberde.

Temsilcilik vilâyetlerniñ devlet memuriyetleriniñ yolbaşçılarını bu malümatnı rayon memuriyetleri ve yerli idare organlarınıñ yolbaşçılarına yetkizip, alınğan tedbirler aqqında mayısnıñ 15-ne qadar esabat bermelerini rica etti.

Mayısnıñ 18-nde Kamânets-Podilskıynıñ şeer künü olacaq. Bu künü bayram programması, şu cümleden «Dj fest Fortetsâ» oyun muzıkası festivaliniñ keçirilmesi planlaştırıla.

Bundan evel qırımtatar cemaatçılığını mayısnıñ 18-nde Kyivde Kyiv Klezmer Festival zemaneviy klezmer muzıkası ve yeudiy medeniyetiniñ festivalini keçirmek planları açuvlandırğan edi. Teşkilâtçılar bu künü bir de bir eglence ve muzıka programması olmaycaq, dep bildirdi.

Mayısnıñ 18-nde Ukrainada ve dünyada 1944 senesi Qırımdan sürgün etilgen qırımtatarlarnı añalar. Şu künü qırımtatarlar tolu birinci eşelon yarımadadan Orta Asiyağa yollanğan edi. Umumen 180 biñ kişi sürgün etildi.

Qırımnıñ çeşit şeerlerinde qırımtatar sürgünliginiñ qurbanlarını añma tedbirleri keçirile.

Ukraina Yuqarı Radasınıñ qararına köre, mayısnıñ 18-i Qırımtatar halqınıñ genotsid qurbanlarını añma künü olaraq ilân etildi.

XS
SM
MD
LG