Ukraina prezidenti Petro Poroşenko mayıs 18-inde Qırımtatar halqınıñ sürgünlik qurbanlarını añma Kününde, “qırımtatarlarnıñ ağrısı - epimizniñ ağrımızdır” dedi.
“Biz sovet qurumınıñ cinayetçiligini iç unutmamımız. Ve zemaneviy cinayetçiler de Qırım yarımadasınıñ ilhaqı içün, qırımlılarğa içkence ve qılınuvları içün cezalanacaq. Eminim ki, qırımtatarlarnıñ öz toprağında serbest yaşamaq aqqı mıtlaq tiklenecek. Boysunmağan qırımtatar halqına şan-şerefler!”, - dedi Poroşenko.
Mayıs 18-inde sovet qurumı qırımtatarlarnı tuvğan toprağından - Qırımdan - sürgün etip başlağanından 75 yıl keçti. Ukrainada ve bütün dünyada Qırımtatar halqınıñ sürgünlik qurbanlarını añma Künü qayd etile.
Cumaertesi künü Kyivde ve Ukrainanıñ başqa şeerlerinde bu künge bağışlanğan tedbirler ötkerilecek. Matem merasimleri dünyanıñ bir çoq şeerinde de keçirilecek.
