Ukraina prezidenti Petro Poroşenko yañı saylanğan prezident Volodımır Zelenskıynıñ inauguratsiyasını azırlav buyruğını çıqardı.
Azatlıq Radiosınıñ bildirgenine köre, inauguratsiyanı azırlaycaq teşkiliy komitet qurulacaq.
Tış işler nazirligi çetel eyyetlerini davet etmek, İç işler nazirligi ise azırlıq ve inauguratsiya vaqtında tertip-nizamnı temin etmek kerek.
Ukraina Nazirler şurası ve Devlet idaresi tedbirlerniñ maliye ve tehnik teminlevini kerçekleştirmeli.
Yañı saylanğan prezidentniñ inauguratsiyasını Ukraina tele ve radio yayınları devlet komiteti temin etecektir.
Ferman derc etilgen künü işke tüşürile.
Ukraina Yuqarı Radası mayısnıñ 16-nda yañı saylanğan prezident Volodımır Zelenskıynıñ inauguratsiyasını mayısnıñ 20-ne saat 10:00-ğa belgiledi.
Yañı saylanğan Ukraina prezidenti Volodımır Zelenskıynıñ matbuat hızmeti parlamentniñ qararını qabul etti, lâkin belgilengen kün kyivliler ve çetel eyyetleri içün bir sıra qıyınlıqlarğa yol açacaq, dep bildirdi.
