Ukraina prezidenti namzetleri Petro Poroşenko ve Volodımır Zelenskıy prezident saylavlarınıñ ekinci turında rey berdi.
Zelenskıy saylav bölügine ömür arqadaşınen beraber keldi. Kimge rey berdiñiz sualine şöyle cevap berdi: «Ukrainağa rey berdim». Poroşenko apayı Marına Poroşenko ile beraber Kyivniñ Zabitler evindeki bölükke keldi. Ukrainanıñ şimdiki prezidenti «Kim saylanacaq müim degil, millet ve devlet areket etmege devam etecek strategiya ve yol müimdir», dedi.
Ukraina merkeziy saylav komissiyası bildirgenine köre, saat 13-ke qadar saylayıcılarnıñ 18,05 fayızı rey berdi. Ukraina politsiyası saylav esnasında 281 bozuv qayd etildi, dep haber ete. Olarnıñ arasında qarunsız teşviqat, bülletenlerniñ fotoresimleri, öldürüv qorquzuvları, bülletenlerniñ çıqarıluvı ve saylayıcılarnı satıp aluv bar.
Bugün, aprelniñ 21-nde, Ukraina vatandaşları öz prezident namzetine rey bere.
Saylav bölükleri saat 8-de açıldı ve aqşam 20-de qapatılacaq.
Ukrainanıñ sabıq prezidenti Viktor Yuşçenko rey berdi. «Bizim içün azatlıqnı, memleketimizni ebediyen saqlap qalmağa isteyim», – dep yazdı o Facebookta. Ukraina Pravoslav kilsesiniñ yolbaşçısı Epifaniy ve patriarh Filaret saylavlarda rey berdiler. Ekisi de ibadetke ketti, çünki bugün pravoslavlar Tal bazarı bayramını qayd ete.
Tünevin Ukraina Milliy politsiyası «sessizlik kününde» saylav esnasınen bağlı 262 bozuvğa dair arizanı qayd etti, dep bildirdi UNİAN agentligi. Politsiya esasen qanunsız teşviqatnen bağlı malümat aldı. Politsiya berilgen arizalar esasında cinaiy tahqiqat başlatıldı, dep bildirdi.
Aprelniñ 19-nda Ukraina prezidenti namzetleriniñ munaqaşaları Kyivdeki «Olimpiyskıy» milliy sport kompleksinde keçirildi. Bunı tek ukrainalılar degil de, rusiyeliler de bekledi. Munaqaşalarnı Rusiye Federal telekanalları yayınladı, alıp barıcılarnıñ izaatlarını diñlemege istemegenler alternativ internet yayınları menbalarına keçmege mecbur edi.
Aprelniñ 21-nde keçirilgen ekinci turdan evel martnıñ 31-nde birinci tur olğan edi. Poroşenko ve Zelenskıy reylerniñ 50 fayızını qazanıp olamadı. Şimdiki prezident 16%-nı aldı, şoumen – 30.
