Link açıqlığı

Saatnıñ esas haberi

Poroşenko ve Almaniyanıñ Hristian-demokratik birliginiñ yolbaşçısı Qırım ve Donbas vaziyetini muzakere ettiler


Ukraina prezidenti Petro Poroşenko Almaniyanıñ Hristian-demokratik birliginiñ yolbaşçısı Annegret Kramp-Karrenbauer ile körüşti
Ukraina prezidenti Petro Poroşenko Almaniyanıñ Hristian-demokratik birliginiñ yolbaşçısı Annegret Kramp-Karrenbauer ile körüşti

Ukraina prezidenti Petro Poroşenko Almaniyada iş ziyaretinen bulunıp, Almaniyanıñ Hristian-demokratik birliginiñ yolbaşçısı Annegret Kramp-Karrenbauer ile körüşti. Bu aqta Poroşenko memuriyetiniñ matbuat hızmeti haber ete.

«Subetdeşler eki taraflı kün tertibi meselelerini, hususan Rusiye işğal etken Donbas ve Qırım vaziyetini muzakere ettiler. Rusiyede qanunsız şekilde tutulğan ukrainalı deñizci ve siyasiy mabüslerniñ tez ve şartsız azat etilüv meselesi ayrıca baqıldı», – dep aytıla haberde,

Almaniyanıñ Hristian-demokratik birligi körüşüv tafsilâtları aqqında şimdilik bildirmey.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete. BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.

Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız şekilde tuta. Olarnıñ sırasına 2018 senesi noyabrniñ soñunda Qara deñiz yalısında zapt etilgen 24 ukrainalı deñizci ve Donbastaki esirler kirmey.

XS
SM
MD
LG