Ukraina prezidenti Petro Poroşenko sentâbrniñ 17-nde Milliy havfsızlıq ve mudafaa şurasınıñ qararını işke tüşürip, Ukraina ve Rusiye arasındaki dostluq, işbirligi ve ortaqlıq añlaşmasınıñ işini toqtattı. Bunı prezident Facebook saifesinde haber etti.
«Milliy havfsızlıq ve mudafaa şurasınıñ Ukraina ve Rusiye arasındaki dostluq, işbirligi ve ortaqlıq añlaşması işiniñ toqtatılmasına dair qararını işke tüşürdim», – dep aytıla haberde.
Bundan evel Poroşenkonıñ matbuat hızmeti sentâbrniñ 30-na qadar Ukraina Tış işler nazirligi Rusiyege 1997 senesi imzalanğan Ukraina ve Rusiye arasındaki dostluq, işbirligi ve ortaqlıq añlaşmasınıñ işi toqtatılğanını bildirmek kerek, dep haber etken edi.
Ukraina devlet yolbaşçısı qayd etti ki, bütün halqara teşkilâtlar, şu cümleden BM, bu meseleden haberdar etilecek.
Avgustnıñ 28-nde Ukraina prezidenti Petro Poroşenko Ukraina ve Rusiye arasındaki dostluq, işbirligi ve ortaqlıq añlaşmasınıñ işini toqtatmaq içün Tış işler nazirliginden kerekli vesiqalar yollamalarını beklengeni aqqında bildirgen edi.
Buña cevap olaraq Rusiye prezidentiniñ matbuat kâtibi Dmitriy Peskov Ukraina ve Rusiye arasındaki eki taraflı munasebetler «daa beter olamaz», dep bildirgen edi. Onıñ fikirince, «bu teren buhran şaraitlerinde bile eki memleketniñ halqlarına zarar ketirecek adım atmaq doğru olmaz».
Ukraina ve Rusiye arasında dostluq añlaşması 1997 senesi imzalanğan edi. Oña binaen, taraflar «biri-biriniñ topraq bütünligini ürmet ete ve aralarındaki sıñırlar deñişmeycegini kefil ete», em de «qurğan munasebetlerinde biri-biriniñ devlet sıñırlarını tanımağa, davalarnı barışıq bir şekilde bitirmege, küç qullanmamamağa» söz bereler.
Vesiqa on yılğa tizildi – 2008 senesi ise avtomatik bir şekilde uzatıldı. Añlaşmanıñ işini toqtatmaq içün Ukraina Rusiyeni eñ az sekiz ay ögüne haberdar etmeli.
