Ukraina prezidenti Petro Poroşenko ukrain tiliniñ devlet tili olaraq qullanuvına dair qanunnı imzaladı. Bu aqta Ukraina devlet yolbaşçısınıñ matbuat hızmeti bildirdi.
Ukraina Yuqarı Radası aprelniñ 25-nde «Ukrain tiliniñ devlet tili olaraq qullanıluvını temin etüv» qanunını qabul etken edi. Bundan evel deputatlar bir qaç afta devamında qanunğa kirsetilgen eki biñden ziyade tüzetüvni baqtı.
Qabul etilgen qanun ukrain tilini devlet idaresi, hızmet, tasil ve kütleviy haber vastaları saalarında pekitmekte. Tilni bilmegen memurlar içün mesüliyet belgilenmekte, amma o, qanun qabul etilgeninden üç yıldan soñ çalışıp başlaycaq.
Aynı vaqıtta, qanun bütün tillerde şahsiy qonuşuvnı ve milliy azlıqlar tilleriniñ serbest qullanuvını sıñırlamay, dep ayta ükümet ve parlamentteki müellifleri.
