Ukraina prezidenti Petro Poroşenko, Ukraina ve Rusiye arasındaki dostluq, işbirlik ve ortaqlıq Muqavelisni üzmek içün qanun leyhasını Yuqarı Radağa teklif etti.
Parlament saytınıñ beyanatında, prezident “acele” kibi belgilegen qanun leyhası dekabr 3-ünde parlamaentke kirsetilgeni yazılğan. Qanun leyhasınıñ metni şimdilik açıqlanmay.
Sentâbrde Kyiv Moskovağa dostluq muqavelesiniñ devam ettirmekni red etkeni aqqında nota yolladı. Rusiye Tış İşler Nazirliginde, Ukrainanıñ muqaveleni devam ettirmekniñ red etüvini “yıqıcı adımlar” dep adlandırdı.
Ukraina ve Rusiye arasında dostluq muqavelesi 1997 senesi imzalanğan edi ve o alâ daa amelde. Başqalarnıñ arasında, muqavele tarafları “biri biriniñ territorial bütünligini ürmet etip, aralarında olğan sıñırlarnıñ bozulamamasını tasdıqlay” ve “suveren musaviylikniñ eki taraflı ürmeti, sıñır bozulmaması, davalarnıñ barışıqlı çezmesi, küç qullanmaması ve küçnen qorquzmaması printsipleri esasında biri birinen munasebet qura”maddeleri de bar.
Vesiqa müddeti on yıl edi, ondan soñ. 2008 senesi onıñ ameli uzatıldı. Muqavele amelini toqtatmaq içün, Ukraina, yañı onyıllıqnıñ bitmesine eñ azdan 6 ay qalğanda, yani 2018 senesi sentâbr 30-ınace, Rusiyege resmiy bildirüv yollamaq kerek.
