Ukrainanıñ beşinci prezidenti Petro Poroşenko Rusiye zapt etken ukrainalı deñizcilerniñ Ukraina Yuqarı Rada saylavları künü, iyülniñ 21-ne qadar, Ukrainağa qaytarıluvınıñ yüksek ihtimali bar olğanına dair haberi olğanını bildire, dep haber ete Azatlıq Radiosı.
«Deñizcilerimiz saylavlar künü, iyülniñ 21-ne qalar azat etile bilecegine dair haberim bar. Böyle olsun dep dua etem, kimler yorğannı özüne tartacaq meni meraqlandırmay, Putin saylav esnaslarınen bağlı sebep ya da pozitivni kimge yükleycek de müim degil. Qaramanlarımıznıñ evde olmasını pek isteyim», – dep ayttı Poroşenko «Ukraina» telekanalınıñ «Söğodni.Pidsumkı» programmasında.
Poroşenko böyle bir malümat qaydan alınğanını aytmadı. Diger menbalar da bu haberni tasdıqlamay.
İyülniñ 11-nde Rusiye prezidenti Vladimir Putin Ukraina prezidenti Volodımır Zelenskıy ile telefonda laf etti. Daa soñra Ukraina prezidentiniñ Ofisi subetniñ esas mevzusı 2018 senesi noyabr ayında Rusiye tarafından zapt etilgen ukrainalı arbiy deñizcilerniñ azat etilüvi oldı, dep bildirdi. Kreml, Zelenskıy ve Putinniñ «Ukraina tarafınıñ teşebbüsi ile» ilk subeti oldı, dep bildirdi.
Bazar künü, iyülniñ 14-nde, keçken sene noyabr ayında Rusiye FSBsi tarafından zapt etilgen «Yañı Qapu» ukrain reyd buksiriniñ miçmanı Andriy Şevçenko 28 yaşını toldurdı.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
