Ukraina prezidenti Petro Poroşenko BM Baş assambleyasınıñ 73-ünci sessiyasında çıqışta bulunıp, Rusiye BM Halqara mahkemesiniñ işğal etilgen Qırımda Qırımtatar Milliy Meclisiniñ yasağını lâğu etmek qararını körmemezlikke urğanını bildirdi.
«2017 senesiniñ başında BM Halqara mahkemesi Rusiyeni işğal etilgen Qırımda qırımtatarlarnıñ temsil organı olğan Meclis faaliyetini yasaq etmek qararını lâğu etmege çağırğan edi. Lâkin Rusiye halqara şartlarğa uymayıp ve Mahkemege sayğısızlıq kösterip, mezkür qararnı körmemezlikke ura», – dedi Poroşenko.
O, «qanunsız Qırım işğaliniñ birinci kününden başlap qırımtatarlar ve etnik ukrainler repressiya ve ayırımğa oğrap, öldürile, azaplarğa çektirile, taqip etile ve uydurılğan qabaatlavlar boyunca apiske alına», dep qoştı.
«Qırımdaki işğalci Rusiye rejiminiñ esir ve qurbanları cedveli aman-aman er kün arta», – dedi Poroşenko.
Onıñ aytqanına köre, ilhaq etilgen yarımadada qırımtatarı ya da ukrain olmaq «cinayet» sayıla.
2016 senesi Rusiye nezaretindeki Qırım Yuqarı mahkemesi, soñra da Rusiye Yuqarı mahkemesi qırımtatarlarnıñ temsil organı olğan Milliy Meclisni yasaq etmege qarar berdi. Qırımtatar Milliy Meclisi Rusiyeniñ topraq bütünligini bozmağa tırışqanında ve insanlarnı qorquzğanında qabaatlanıp, ekstremist teşkilât olaraq tanıldı. Amma 2017 senesi aprel ayında BM Halqara mahkemesi Ukraina açtırğan dava çerçivesinde Rusiyeni Meclis yasağını lâğu etmesine çağırdı.
Bu sene aprelniñ 24-nde belli olğanı kibi, Kyiv BM Halqara mahkemesine muracaat etip, Rusiyeniñ 2017 senesi qabul etilgen Rusiyege qarşı vaqtınca tedbir alınmasına dair buyruqqa köre Qırımtatar Milliy Meclisini yasaq etüv qararını lâğu etmek mecbur olğanını tasdıqlamağa rica etken edi.
