Ukraina prezidenti Petro Poroşenkonıñ aytqanına köre, Rusiye tarafından cenk telükesi «tek deklaratsiya degil, kerçek bir şey ola». Bu aqta Azatlıq Radiosı bildire.
Prezident fevralniñ 26-nda Kyivde Ukraina Silâlı quvetleriniñ reberlerinen operativ-strategik toplaşuvda çıqışta bulunıp, Moskva cenkke faal azırlıq köre, dedi. Devlet yolbaşçısınıñ aytqanına köre, «Rusiyeniñ istekleri» tek Ukrainanen sıñırlanmay.
«Ukraina sıñırı yaqınlarında, Smolensk, Voronej, Belgorod, Rostov vilâyetlerinde ve ilhaq etilgen Qırımda azırlıq kete», – dedi Poroşenko.
Onıñ aytqanına köre, Moskva «Ukrainadaki maqsadlarına silâ yolunen irişmek» imkânından «iç bir şekilde» vazgeçmedi.
Poroşenko Qara deñiz regionınıñ askeriyleştirilüvi aqqında hatırlattı. Onıñ aytqanına köre, işğal altındaki Qırımda 30 biñ Rusiye askeri buluna.
«Rusiyeniñ istekleri tek Ukrainanen sıñırlana dep tüşünmek yañlış olur edi. Onıñ gibrid cenki bütün Avropanıñ siyasiy landşaftını tolusınen deñiştirmege istey. Bazı vaqıtları planlar büyük deñişmelerge tarqala», – dep qayd etti o.
Keçken afta Poroşenko BM Baş Assambleyasınıñ toplaşuvında çıqışta bulunıp, Rusiye-Ukraina sıñırı boyunca Rusiye silâlı quvetleriniñ sayısı 87 biñden ziyade arbiy ola, dep bildirdi.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete. BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
