Prezidentlik müddetini bitirip turğan Petro Poroşenko, “Blok Petra Poroşenka” parlament fraktsiyasınen körüşüvde, bu yıl küzde keçecek parlament saylavlarında iştirak etmege niyetlenlegeni aqqında ve firqa cedvellerini praymeriz (primaries) vastasınen tizmek kerek olğanını bildirdi.
“Biz parlament saylavlarına ketecekmiz”, - dedi Yuqarı Radada BPP fraktsiyasınıñ başı Artur Gerasimov jurnalistlerge, dep bildire “İnterfaks-Ukraina”.
O qayd etti ki, partiya cedvelleri praymeriz vastasınen tizilecek.
“Endi ise taqımımıznıñ azası olmağa istegenler arasında praymeriz keçirilecek dep qarar aldıq”, - añlattı Gerasimov.
Onıñ aytqanına köre, firqa qurultayı yañı Ukiraina prezidentiniñ inauguratsiyasından soñ ötkerilecek.
Parlament fraktsiyasınıñ başı aytqanına köre, Poroşenko siyasiy partiyanıñ başı olacaq.
Merkeziy saylav komissiyası ekinci turı aprelniñ 21-nde keçirilgen Ukraina prezidenti saylavları prokotollarınıñ 100%-ını teşkerdi.
Bu malümatqa köre, şoumen Volodımır Zelenskıy 13 541 530 rey (73.22%) qazandı, Ukrainanıñ şimdiki prezidenti Petro Poroşenkoğa ise 4 522 320 saylayıcı (24,54%) qoltuttı.
