Ukraina prezidenti Petro Poroşenko Rusiye işğal etken Qırımnı «eñ yaqın vaqıtta, prezident saylavlarından soñ birden» qaytarmaq içün elinden kelgenini yapacağını bildirdi. Bu aqta Poroşenko «Ukraina» telekanalına ayttı, dep bildire prezidentniñ matbuat hızmeti.
«Bizge qarşı olğanını bilmek kerekmiz. Dünyanıñ eñ büyük arbiy maşinalarından biri – Qırımnıñ qanunsız ilhaqını yapmağa vazife bergen totalitar maşina. Yapqan birinci işimiz – Qırımnıñ işğalden qurtarılmasına yardım etken Ukraina ile dünya birdemligini tikledik», – dep tekrarladı Poroşenkonıñ aytqanlarını onıñ matbuat hızmeti.
Onıñ qayd etkenine köre, «Ukraina (Qırımnı qaytarmaq içün – QA) iç bir mezatqa, iç bir gizli añlaşmalarğa razı olmaycaq».
«Qırım Ukrainağa qaytarılacaq. Bunıñ eñ yaqın vaqıtta, prezident saylavlarından soñ birden olması içün elimizden kelgenini yapacaqmız. Putinniñ aytqanlarını eşitken ediñiz, o, prezident saylavlarından evel bunı yapmaycaq, çünki Poroşenko degil de, başqa birisi saylanacağına ümüt ete, Ukrainanıñ yañı akimiyeti oña kelip, Qırımnı ediye etmesini istey. Menim aytacağım – çoq bekleycekler. Qırımnı azat ettirecekmiz», – dep qoştı Poroşenko.
Ukraina prezidenti Qırımtatar Milliy Meclisine de teşekkürler bildirdi.
«Olarğa ayrıca muracaat etmege isteyim – Qırımnı qaytarmaq içün küreşecegimizge inanıñız. Sizni unutmaymız. Küreşiñizden ğururlanamız. Beraber yeñecekmiz», – dedi Poroşenko.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
