Ukraina prezidenti Petro Poroşenko cumaertesi künü, aprelniñ 6-nda, Kyivde ukrainalı faallernen körüşti. Muzakere etilgen meselelerniñ bir qısmı Qırımnen bağlı edi, hususan yarımadanı işğalden qurtaruv, Ukraina Anayasasınıñ deñişmeleri ve Qırımdan köçmege mecbur olğanlarnıñ integratsiyası laf etildi.
Bu aqta körüşüvde iştirak etken «Qırım eviniñ» programm müdiri Alim Aliyev Qırım.Aqiqatqa tarif etti.
«Men ve Tamila Taşeva («KrımSOS» cemaat teşkilâtınıñ koordinatorı – QA) Qırım ve köçip kelgenler aqqında sual berdik. Qırımnı işğalden qurtaruv aqqında: insanlar yarın ya da o birisi kün ne olacağını añlamay. Ukraina Anayasasınıñ 10-uncı maddesiniñ milliy-territorial muhtariyetnen bağlı deñişmelerni laf ettik. Köçip kelgenlerniñ rey berüv aqqı ve olarnıñ integratsiyasını muzakere ettik», – dep tarif etti Aliyev.
Onıñ aytqanına köre, Poroşenko faaller kötergen meselelerniñ al etilmesinde yardımcı olacağını vade etti.
«Ara-sıra ğayet duyğulı laqırdı oldı, atta kerçekten sert oldı. Amma, maña köre, Poroşenko pek samimiy edi. Böyle subetler bir qaç yıl evelsi olmağanına yazıqsınam. Üç saat qadar laf ettik», – dep qoştı faal.
Körüşüv Ukraina prezidentiniñ rezidentsiyalarından birinde olıp keçti.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
