Ukraina prezidenti Petro Poroşenko Kyivde keçirilgen «İnsan aqları beyannamesiniñ 70 yılı: Ukrainanıñ kün tertibi» forumında çıqışta bulunıp, Qırımda insan aqları vaziyeti daa beter ola, dedi.
«Qırımdaki insan aqları vaziyetini aytacaq olsaq – zulum, uquqsızlıq ve bütünley askeriyleştirüv… Bir halq – qırımtatarlar – yoq etile. İşğalci akimiyet Stalinniñ yapamağanını yapa – Meclisni ekstremist teşkilât olaraq ilân etip liderlerini yoq ete ve kimliklerini yoq ete, Qırımnıñ tamır halqını Rusiye qazanında iritecek ola», – dedi Poroşenko.
Onıñ qayd etkenine köre, Ukraina «Kremlniñ esirlerini azat ettirmek içün» elinden kelgenini yapa.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
