Rusiye Qırımnı ilhaq etip ve Donbasnıñ bir qısmını işğal etip, medeniy dünyağa qarşı gibrid cenkini başlattı.
Bu aqta Ukraina prezidenti Petro Poroşenko fevralniñ 19-nda Ukraina parlamentiniñ Rusiyeniñ Ukrainağa qarşı silâlı istilâsı başlağanınıñ beş yılına bağışlanğan toplaşuvında ayttı, dep bildire Qırım.Aqiqat mühbiri.
«Kollektiv telükesizlik sisteması bozulğan edi. Qırım ilhaqı, Donbasnıñ bir qısmını işğal etüv Moskvanıñ tek Ukrainağa qarşı degil, AB, şu cümleden Poloniya, ABD, NATO, Baltiya memleketleri, bütün demokratik medeniy dünyağa qarşı gibrid cenkiniñ başlanğıçı oldılar», – dep qayd etti Poroşenko.
Daa evel toplaşuvda Avropa şurasınıñ reisi Donald Tusk qayd etkenine köre, Avropa Birligi Rusiyeniñ Qırım ilhaqını iç bir vaqıt tanımaycaq ve Rusiyeniñ Azaq deñizindeki istilâsına razı olmaz.
Fevralniñ 19-nda Ukraina Yuqarı Radasında Rusiyeniñ Ukrainağa qarşı silâlı istilâsınıñ beş yılı munasebetinen toplaşuv keçirile. Ukraina prezidenti Petro Poroşenkonıñ çıqışı beklenile. Davet etilgenler arasında – Ukraina baş naziri Volodımır Groysman, ükümet azaları, cemaat teşkilâtları, ATO veteranları birligi, Qırımtatar Milliy Meclisiniñ vekilleri, meşur ukrain ve çetel siyaset erbapları, halqara parlament teşkilâtları ve diplomatik korpusnıñ temsilcileri.
Ukraina Yuqarı Radası 2014 senesi fevralniñ 20-ni Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey.
