Keriç boğazında ne oldı (video)

Noyabrniñ 25-nde Rusiye FSBsiniñ gemileri üç Ukraina gemisine ücüm eterek, silâ qullanıp olarnı zapt etti. Neticede, soñki malümatqa köre, altı deñizci asker yaralandı. Rusiye, Ukraina gemilerine qarşı silâ qullanğanını tasdıqladı. FSB, Ukraina gemileri «Rusiyeniñ devlet sıñırlarını bozdı», dep israr etmege devam ete. Ukraina Milliy telükesizlik ve mudafaa şurasınıñ acele toplaşuvında Ukraina cenk vaziyetini ilân etmek içün azırlıq körmege qarar alındı. Noyabrniñ 25-nde saba Ukraina Arbiy deñiz quvetleri bildirdi ki, Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı. Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı. (Video: Reuters)